‘ଫେମ୍’

ହିନ୍ଦୀ ସିନେମାରେ ନହେଲେ କ’ଣ ହେଲା ? କେତୋଟି  ଝାଡ଼ଖଣ୍ଡି ସିନେମାରେ ତ ଗୀତ ମିଳିଯାଇଥିଲା ତାକୁ । ହଉ ପଛେ ଲୋ’ ବଜେଟ, ବି- ଗ୍ରେଡ ସିନେମା  । ନାଇଁ ମିଛ କହିଲା ରାହୁଲ ଶୀବାସ୍ତବ  । ମିଳିନି । ସର୍ବଭାରତୀୟ ସ୍ତରରେ ପ୍ରାୟ ଛ ମାସ ଧରି ପ୍ରଚାରିତ ହୋଇଥିବା ଓ ଚର୍ଚାର କେନ୍ଦ୍ରବିନ୍ଦୁ ପାଲଟିଥିବା ରିଆଲିଟି ସୋ ‘ହିନ୍ଦୁସ୍ଥାନ କୀ ଆୱାଜ- ୨୦୧୫’ର ବିଜେତା ରାହୁଲକୁ  ବୁଲିବାକୁ ପଡ଼ିଚି ଷ୍ଟୁଡିଓ ପରେ ଷ୍ଟୁଡିଓ । ସ୍ୱପ୍ନର ସହର ମୁମ୍ବାଇରେ ତା’ କଂଠର ଦିୱାନା ଦେଖେଇ ହେଇଥିବା ଅନେକ ବିଚାରକ- ସଂଗୀତ ନିର୍ଦ୍ଦେଶକ, ଦେଖି ନପାରିବା ପରି ଏଡ଼ାଇ ଯାଇଛନ୍ତି ରାହୁଲ ଶ୍ରୀବାସ୍ତବକୁ । ଏବେ ସେ ଝାଡ଼ଖଣ୍ଡରେ । ତା’ ନିଜ ରାଜ୍ୟରେ ରାଜା ପରି ବୁଲୁଚି । ଷ୍ଟେଜ ପରେ ଷ୍ଟେଜ । ଝାଡ଼ଖଣ୍ଡ କୀ ସାଆନ ରାହୁଲ ଶ୍ରୀବାସ୍ତବ ଆଜି ଯାଉଚି ବୋକାରେ । ଷ୍ଟିଲ ପ୍ଲାଣ୍ଟର ଏକ ବର୍ଣ୍ଣାଢ଼୍ୟ ଉତ୍ସବର ଆଜି ସେ ମୂଖ୍ୟ ଆକର୍ଷଣ ।  ଆୟୋଜକଙ୍କ ଇନୋଭା ଗାଡ଼ି ଭିତରେ ରାହୁଲ ମନେ ମନେ କହୁଥିଲା ; ଚଲୋ ଠିକ ହେ… କୁଚ୍ଛ ତୋ ମିଲ ଯାତା ହୈ÷ ।  ଅନ୍ୟ ମନସ୍କ ହେଉଥିଲା ସହର ଭିତରେ ନିଜ ହୋଡ଼ିଂକୁ ଦେଖି । ପ୍ରାୟ ପାଂଚ ହଜାର ଜାଗାରେ ତା ହୋଡ଼ିଂ ଲାଗିଥିବାର ସୂଚନା ଦେଉଥିଲା । ତା’ ପାଖରେ ବସିଥିବା, ତାକୁ ଆଣିବାର ଦାୟିତ୍ୱ ନେଇଥିବା ଜଣେ ଷ୍ଟିଲ ପ୍ଲା’ର ଯୁବ ଇଂଜିନିୟର । ରିଫ୍ରେଶ ହେଉଥିବା ବଂଗଳାର ଲବିରେ ବୁଲୁବୁଲୁ ଭାବୁଥିଲା ରାହୁଲ…. ଏ.ସି. ଅଡିଟୋରିୟମ । ଦୁଇ ହଜାର ଦର୍ଶକ, ଚାରି ହଜାର ହାତର ତାଳି.. । ସମସ୍ତେ ଝୁମି ଯାଉଥିବେ ତା ଓଜନଦାର କଂଠର ମାଧୁର୍ଯ୍ୟରେ ! ପୁଣି ଥରେ ସ୍ମାଟ ଫୋନକୁ ଚାର୍ଜ କରି ପରଖିନେଲା । ସବୁ ପ୍ରସ୍ତୁତ ଅଛି । ପୁରା ରକଷ୍ଟାର ଲୁକରେ ରାହୁଲ ପହଂଚିଲା ପ୍ରେକ୍ଷାଳୟ ନିକଟରେ । ପ୍ରେକ୍ଷାଳୟ ପଛପଟର ଗ୍ରୀନରୁମରେ ଏକ ହାତ ନଥିବା ପ୍ଲାଷ୍ଟିକ ଚେୟାରରେ ସେ ବସିଲା । ଉଦଘୋଷକ ଜଣାଇଦେଲେ ଦର୍ଶକଂକୁ ରାହୁଲ ଶ୍ରୀବାସ୍ତବର ଉପସ୍ଥିତି । ତାଳିର ଲହରି ପରେ ପରେ ଅନେକ କୁନି ପିଲା, ଯୁବକ ଯୁବତୀ, ପୈ÷ଢ଼ ବି ବ୍ୟାକ ଷ୍ଟେଜ ଆସି ଅଟୋଗ୍ରାଫ ନେଲେ, ସେଲଫି ନେଲେ ତା’ ସହ । ଆଦୈା ଚିହ୍ନି ନଥିବା ଲୋକଂକ ସହ ହସି ହସି ପୋଜ ଦେଉଥିଲା । ‘ଉଇଥ ଲଭ’ ଲେଖି ଦଉଥିଲା ଫ୍ୟାନ ମାନଂକ ଚଟି ଖାତାରେ, ଡାଏରୀରେ ।ପ୍ରୋଗ୍ରାମ ଚାଲିଥାଏ । ଗୋଟାକ ପରେ ଗୋଟାଏ ଆଇଟମ୍ । ଷ୍ଟିଲ୍ ପ୍ଲାଣ୍ଟକର୍ମଚାରୀମାନଙ୍କ ପିଲାମାନେ, ପତ୍ନୀମାନେ ପରିବେଷଣ କରି ଚାଲିଥା’ନ୍ତି ସମବେତ ନୃତ୍ୟ, ସଂଗୀତ । ତାଳିରେ ଫାଟି ପଡ଼ୁଥିବା ଦର୍ଶକ ମହଲ୍ କ’ଣ ଭୁଲିଗଲା କି ତା’କୁ?ଯଥାସଂଭବ ଭଦ୍ରତାର ସହ ସେ  ଉଦ୍ଘୋଷକ ମହାଶୟକୁ ନିଜର ସମୟ କଥା ପଚାରିଲା । ଅଳ୍ପ ହସିଦେଇ ଉଦଘୋଷକ ମହାଶୟ ମଂଚରେ ଚତୁର୍ଥ ଥର ପାଇଁ ଘୋଷଣା କରିଦେଲେ, ହିନ୍ଦୁସ୍ତାନ କୀ ଜାନ, ଝାରଖଣ୍ଡ କୀ ସାନ…. ରାହୁଲ ଶ୍ରୀବାସ୍ତବ … ବସ କୁଚ୍ଛ ହି ଦେର….. । ଏମ.ଡି ଙ୍କ ହାତ ଲେଖା ଚିଟ ଆଧାରରେ ପ୍ରୋଗ୍ରାମ ଆଗେଇ ଚାଲିଥାଏ  । ଏବେ ନେକସଟ ଆଇଟମ ହଉଚି ମହାମାନ୍ୟା ଏମ.ଡି. ଙ୍କ ଧର୍ମପତ୍ନୀଙ୍କର ବେସୁରା ସଂଗୀତ ପରିବେଷଣ ।  ଉଦଘୋଷକଂକର ରାହୁଲ ସଂପର୍କିତ ଘୋଷଣାଠାରୁ ଏ ଘୋଷଣା ପାଇଥିଲା ପ୍ରାୟ ଦଶ ଗୁଣ କରତାଳି, ହୁଇସିଲ ।ତା’ ପାଳିର ପୂର୍ବ ଅନୁମାନ କରି ସେ ଇୟର କର୍ଡରେ ଶୁଣି ନେଉଥିଲା ଟ୍ରାକକୁ….. ଗୁଣୁଗୁଣାଉ ଥିଲା, ମିଲେ ହୋ ତୁମ ହମକୋ, ବଡେ ନସିବୋ ସେ । ପ୍ରାୟ ତିନି ଘଂଟାର ପ୍ରତୀକ୍ଷା ପରେ ତା’ର ପାଳି ଆସିଲା । ଚିରାଚରିତ ଢଙ୍ଗରେ ନମସ୍କାର କରି ଫ୍ଲାଇଙ୍ଗ କିସ ବାଣ୍ଟୁ ବାଣ୍ଟୁ ଷ୍ଟେଜକୁ ଗଲା ରାହୁଲ । ସେତେବେଳକୁ ହଲ ପ୍ରାୟ ଫାଂକା । ଅଧାରୁ ଅଧିକ ଦର୍ଶକ ଅଭିଭାବକ ସେତେବେଳକୁ ଘରକୁ ଫେରି ଗଲେଣି । ରାହୁଲ ଶ୍ରୀବାସ୍ତବ ସୋ’ରେ ଭାଗ ନେଇ ଗର୍ବିତ ହେଉଥିବା ତାଙ୍କର ପତ୍ନୀମାନଙ୍କୁ, ପିଲାମାନଙ୍କୁ  ନେଇ । ଗଣି ହେଲା ପରି କେତୋଟି ତାଳି ଆଉ ହୁଇସିଲରେ ରାହୁଲ କ’ଣ ଗାଉଥିଲା, କାହିଁକି ଗାଉଥିଲା- ଜାଣିପାରୁନଥିଲା । ବୁଝି ପାରୁନଥିଲା ପରିବେଶକୁ, ନିଜକୁ,  ନିଜର ଅସହାୟତାକୁ । ରାତି ଅଧରେ ବସରେ ବସି ନିଜ ସହରକୁ ଫେରୁଥିବା ବେଳେ ସେ ଏତିକି ବୁଝିପାରୁଥିଲା । ହଁ, ରାହୁଲ ଶ୍ରୀବାସ୍ତବ କେବଳ ଏକ ଫେମ୍ ଆଉ କିଛି ନୁହେଁ ।