ଯାଜପୁର, (ବାଘୁଆବାର୍ତ୍ତା): ନଦୀରେ ଗାଧୋଉଥିବା ବେଳେ ବୁଡ଼ି ଗଲେ ଦୁଇ ସାଙ୍ଗ। ସେମାନଙ୍କ ମଧ୍ୟରୁ ଜଣଙ୍କର ମୃତ୍ୟୁ ଘଟିଥିବା ବେଳେ ଅନ୍ୟ ଜଣେ ନିଖୋଜ ଅଛନ୍ତି। ଘଟଣାଟି ଘଟିଛି ଯାଜପୁର ଜିଲ୍ଲା ବାଲିଚନ୍ଦ୍ରପୁର ନିକଟ ନାନପୁରରେ। ମୃତକଙ୍କ ନାଁ ଅଭିଷେକ ପାତ୍ର। ତାଙ୍କ ଘର ଭୁବନେଶ୍ୱରରେ। ନିଖୋଜ ଯୁବକଙ୍କ ନାଁ ଦିପ୍ତୀରଞ୍ଜନ ପାଢ଼ୀ। ତାଙ୍କ ଘର ପଟ୍ଟାମୁଣ୍ଡାଇରେ। ଦିପ୍ତୀ ତାଙ୍କ ସାଙ୍ଗ ଅଭିଷେକଙ୍କୁ ନେଇ ନାନପୁରରେ ଜଣେ ବନ୍ଧୁ ଘରକୁ ଆସିଥିଲେ। ଆଜି ଦୁହେଁ ସେଠାରେ ବିରୁପା ନଦୀରେ ଗାଧୋଉଥିବା ବେଳେ ବୁଡ଼ି ଯାଇଥିଲେ। ଅଭିଷେକଙ୍କୁ ଗ୍ରାମବାସୀ ଉଦ୍ଧାର କରିଥିଲେ। ତେବେ ସେତେବେଳକୁ ତାଙ୍କର ମୃତ୍ୟୁ ହୋଇସାରିଥିଲା। କିନ୍ତୁ ସେମାନେ ଦିପ୍ତୀରଞ୍ଜନଙ୍କୁ ପାଇନଥିଲେ। ଖବର ପାଇ ଚଣ୍ଡିଖୋଲରୁ ଦମକଳ ବାହିନୀ କର୍ମଚାରୀ ଆସି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ତେବେ ଖବର ଲେଖାଯିବା ପର୍ଯ୍ୟନ୍ତ ଦିପ୍ତୀରଞ୍ଜନଙ୍କ ପତ୍ତା ମିଳି ନଥିଲା।
